LAOAG CITY – Kalikagum ni Vice Mayor Rey Carlos Fariñas a mai-update wenno mabalbaliwan ti nakaipalaon iti fare guide a maikabil kadagiti tricycle ditoy siudad ti Laoag.
Daytoy ti nagbalin a rakurakna kalpasan nga inpakaammo ni Sangguniang Panlungsod Member Jaybee Baquiran nga adda dagiti naipadanon a report kenkuana maipanggep iti sobra a panagsingir ti plete kas ti maysa a pasahero a naglugan manipud iti Provincial Capitol agingga iti dakkel a mall ditoy siudad ket ditoy a siningirda ti 60 a pisos.
Segun ken ni Vice Mayor Fariñas, rumbeng a maikabil iti fare guide dagiti key areas wenno plete kadagiti partikular a lugar tapno saan a patpatangan dagiti tricycle drivers no mano ti singirenda a plete.
Inbatadna a malaksid iti daytoy ket kasapulan a makita ti tricycle ti maysa nga agaplikar ti prangkisa no adda met la ti nakaikabil a fare guide wenno awan.
Inlawlawagna a kasapulan a maiprinta ti tarpaulin ken maikabil iti tunggal terminal ti tricycle dagiti pammalagip kas ti proseso iti panagreklamo, hotline wenno numero a mabalin a tawagan ken multa a kaibatogan dagiti masalungasing dagiti tricycle drivers.
Kunana a babaen iti daytoy a banag ket al-alisto a makita ken mapakaammoan dagiti residente ditoy siudad ken maikkan ti pagbutngan dagiti tricycle drivers nga agbalin nga abusado nangruna iti panagsingir ti plete.
Maipalagip nga inpakaammo ti Bise Mayor a kabayatan ti regular session nga adda ti uppat a tricycle drivers ditoy siudad ti naipaayan ti citation ticket apaman a naduktalan a sobra ti panagsingirda ti plete kabayatan ti Palarong Pambansa 2025.
