LAOAG CITY – Natay ti driver ti motorsiklo kalpasan ti panagdinnungparda iti maysa nga SUV iti national highway ti Brgy. 40 Buyon iti ili ti Bacarra.
Segun ken ni Police Lieutenant Colonel Roldan Suitos, ti Hepe iti Philippine National Police iti nasao nga ili, nabigbig ti biktima a nangiturong iti motorsiklo nga Honda 155 nga agmaris ti nangisit a ni Melchor Ronquillo Balanay, agtawen ti 48, naasawaan, welder ken residente ti Brgy. 4 Sta Maria iti ili ti Vintar idinto a nabigbig met ti driver ti Isuzu Fuego pick-up nga SUV nga agmaris ti dark blue a ni Rex Soteco Abara, agtawen ti 53, naasawaan, construction worker ken residente ti Brgy. 25 ditoy siudad ti Laoag.
Inbatadna a kabayatan a dumaldalyasat ti motorsiklo nga agpa-amianan idinto ti SUV ket agturong met nga agpa-abagatan no sadino maipagarup a nag-overtake ti SUV iti maysa a lugan a nangitunda ti panagdinnungparda iti nakamotorsiklo.
Gapu iti daytoy, kunana a nagsagaba ti sugat ti driver ti motorsiklo iti nagduduma a paset ti bagina a dagus a naitaray iti Governor Roque Ablan Sr. Memorial Hospital ditoy siudad ti Laoag ngem naideklara a dead on arrival babaen ken ni Attending Physician Dr. Vivien Abitong idinto ti nangiturong ti SUV ket saan a naan-ano.
Kabayatanna, napagnunumoan dagiti agsumbangir a partido a tumulong ti driver ti SUV kadagiti magastos ti biktima gapu iti napasamak a desgrasia.
