LAOAG CITY – Dead on the spot ti maysa a lalaki a nakamotorsiklo kalpasan a naidungpar iti traffic sign ken natnag iti kanal iti national highway iti Brgy. Nagsanga iti ili ti Pasuquin.
Segun ken ni Police Major Julius Basallo, ti Hepe iti Philippine National Police iti nasao nga ili, nabigbig ti driver ti motorsiklo a Matte Black Yamaha Aerox a ni John Mark Zamora nga agtawen ti 27, awanan asawa ken residente ti Brgy. Susugaen iti nasao met laeng nga ili.
Inbatadna a basar iti insayangkatda nga imbestigasion, kabayatan a dumaldalyasat ti motorsiklo nga agpa-amianan ket kellaat daytoy a napukawan ti kontrol ti manibela a nangitunda ti pannakadesgrasiana.
Inlawlawagna a ti maseknan a driver ket saan a nakasuot ti helmet ken napalaos ti bartekna idi napasamak ti aksidente.
Kunana a gapu iti nasao a pasamak ket nagsagaba ti nakana a sugat kangrunaanna iti ulo ti biktima a rason ti dagus a pannakatayna.
Innayonna nga iti agdama ket manarimaan ti panangduktalda ti balor iti naperdi a paset ti motorsiklo.
