LAOAG CITY – Natay ti driver ti motorsiklo kalpasan ti panagdinnungparda iti maysa a dump truck iti paset ti Cauplasan Bridge iti Brgy. Guerrero iti ili ti Dingras.
Ti driver ti motorsiklo nga Euro 125 nga agmaris ti nalabbaga ket agtawen iti 32 ken residente ti Sitio Capiddigan iti Brgy. Barcelona iti ili ti Solsona.
Naitaray ti biktima iti Mariano Marcos Memorial Hospital and Medical Center iti siudad ti Batac babaen iti panagresponde ti Dingras Municipal Police Station, Dingras Bureau of Fire Protection ken ti Municipal Disaster Risk Reduction and Management Office Rescue Team.
Basar iti imbestigasion, ti driver ti motorsiklo ket awan ti puotna idi nasangpetan dagiti napan nagresponde nga otoridad.
Naammoan a kabayatan a dumaldalyasat ti nakamotorsiklo nga agpa-laud ket ginandatna nga ag-overtake ti maysa a lugan.
Nupay kasta, nasagidna ti akinkannigid a paset ti dump truck a nangitunda ti pannakaguyodna iti lugan.
Kabayatanna, dagus a naglibas ti driver ti dump truck kalpasan ti napasamak nga insidente.
Iti agdama, agtultuloy ti maiwaywayat nga hot pursuit operation para iti pannakaarestar ti driver ti dump truck.
