LAOAG CITY – Positibo ni Prof. Arlene Lu-Gonzales, Asst. Professor 4 iti Mariano Marcos State University iti ciudad ti Batac a malapdan ti climate change babaen ti panagtitinnulong, saan laeng nga iti biang ti gobierno no di ket amin a tattao.
Inbatad na a masapol nga agbalin a climate friendly ti aksyon amin a tattao babaen iti panagmula ti ado a kayo.
Malaksid iti daytoy, pilyen dagiti us-usaren a nababa laeng ti carbon footprint na tapno maliklikan ti climate change.
Inpetteng na a no maminpinsan a mabaliwan ti nakaugalianen nga ar-aramiden dagiti tattao tapno agbalin a climate friendly ket dakkel pay laeng ti namnama a makaruk-at manipod iti problema ti climate change.
Immunan nga inlawlawag ni Prof. Gonzales a no saan a malapdan ti climate change ket dakkel a perdisyon ti itunda na iti intero a lubong.
Innayon na a daytoy pay ti makaigapu no apay nga adda dagiti pagilyan a masansan ti pannakalayos na idinto a dagiti dadduma ket addan ti sumagmamano a tawen a saan da nga agpasar ti tudo a rason ti panagpasar da ti nakaro a tikag ken awan payen ti usaren da iti inaldaw.
