LAOAG CITY – Nakita iti maysa a panagadal nga agresulta iti nalabes a kinalukmeg, a maysa a kita ti malnutrision, ti nalabes a panagtutok dagiti agtutubo iti panagusar kadagiti gadget.
Impakita ti datos manipud iti Department of Science and Technology-Food and Nutrition Research Institute (DOST-FNRI) nga idi 2022, 16.1 a porsiento kadagiti ubbing nga agtawen iti 6 agingga iti 12 ti nalabes ti timbangda ken nalukmeg.
Naammoan nga 11.7 porsiento kadagiti agtutubo nga agtawen iti 13 agingga iti 19 ken 44.4 porsiento kadagiti nataengan nga agtawen iti 20 agingga iti 59 ti addaan iti isu met laeng a kasasaad.
Kinuna ni Dr. Michelle Sy iti Child Neurology Society of the Philippines a ti adu unay nga screen time ket mabalin a pakaigapuan ti naginad a panagdakkel ti utek.
Ti napaut a panangusar iti oras ti screen nga addaan iti napartak unay a panagbalbaliw ti screen wenno panagbalbaliw ti ladawan ti mangisuro iti utek a mangnamnama iti nangatngato a lebel ti pannakatignay ken mangiturong iti kinaawan atension.
Paidamanna pay dagiti ubbing kadagiti padas a kasapulanda nga adalen para iti umno a panagdakkel ti utek.
Kabayatanna, inladawan ni Dr. Cynthia Cuayo-Juico, pediatrician ken fellow ti Philippine Pediatric Society, ti agdama a kasasaad a “super alarming” gapu ta nagbalinen a sadot ken saan nga aktibo dagiti ubbing. Naapektaran pay ti social skills-da gapu ta agpannurayda iti teknolohia.
