LAOAG CITY – Maysa a nalatak a modelo idiay India ti nakaawat iti pammabalaw kalpasan a nagpammarang a natay tapno maitandudona iti adbokasiana iti cervical cancer.
Nakigtot dagiti fans ti modelo a ni Poonam Pandey idi adda rakurak iti online account-na a natay idi Pebrero 3, 2024 no sadinno nailanad ditoy a natay ni Pandey gapu iti cervical cancer.
Ni Pandey ket agtawen ti 32 a modelo, reality show star ken aktres ti Bollywood.
Nagbalin a nalatak kadagiti reality show a “Fear Factor India” ken “Lock Upp.”
Nupay kasta, napagduduaan ti kinapudno ti ipapatayna kalpasan nga adda ti nagkomento a nakitana laeng ni Pandey iti maysa nga event iti red carpet idiay Goa, tallo nga aldaw sakbay a naipakaammo ti ipapatayna.
Basar iti komento, saan a nagsakit ni Pandey kabayatan ti kaaddana iti nasao nga event.
Maysa nga aldaw kalpasan a naipadamag ti ipapatayna, nag-post ni Pandey iti bidyu a nangipakitaanna a sibibiag pay ken inadmitirna nga amin ket maysa laeng a publicity stunt.
Segun iti daytoy, kalikagumna nga itandudo ti cervical cancer awareness idiay India ken pagarupenna a daytoy ti kasayaatan a wagas tapno pagsasaritaan ti sakit.
Nagsasaruno ti kritisismo ken ni Pandey ngem inpannakkel pay ti modelo nga ipannakkelna ti inaramidna gapu ta kaaduan a tattao ket sumangsango ti cervical cancer.
