LAOAG CITY – Inlungalong ni Malabon City Rep. Antolin Oreta ti maysa a gakat a mangikeddeng ti nutrition facts a masapol a maikabil iti sango ken saan nga iti likud dagiti produkto.
Daytoy ket gapu ta rumbeng a nalawag ti nutrition label kadagiti produkto a magatgatang iti merkado.
Ti kangrunaan a naipalaon iti House Bill No. 6147 wenno Healthy Food Environment Act nga inpila ni Oreta ti probisyon a Front-of-Pack Nutrition Labels (FOPNL).
Inpettengna a ti nalawag a nutrition facts iti sango ket mangipaay ti impormasyon kadagiti aggatang no daytoy ket nasustansya a rumbeng a gatangen wenno saan.
Innayon na a no mapagbalin a linteg ti gakat ket mapagbalin a simple dagiti termino a maikabil iti label tapno al-alisto a maawatan.
