LAOAG CITY – Inpakaammo ni SFO4 Dominador Ignacio, municipal fire marshal iti BFP Burgos nga agtultuloy a maim-imbestigar ti namunganayan ti uram iti maysa a 2-storey a pagtaengan a kukua ti pamilya Clemente iti ili ti Burgos.
Kuna na nga iti follow-up investigation nga insayangkat da ket naamuan da nga agmaymaysa ti baket idi napasamak nga uram gapu ta nagturong ditoy siudad ti Laoag ti maysa a kabbalay na.
Segun kenni Ignacio, maipagarup a namunganay ti uram gapu ti nakasaksak a transistor radio a kaabay ti katre ti anak na iti baba ti pagtaengan.
Kuna na nga idi napan kinita ti baket nga adda ti nabara iti baba ti pagtaengan da ket nakita na a maur-uramen ti rabaw ti katre ti anak na.
Ginandat pay laeng ti baket a patayen ti uram babaen ti nabasa a lupot ngem saan na a nabaelan agingga a naggayab ti tulong.
Nupay kasta, inbatad ni Ignacio a saana naminpinsan a nauram ti pagtaengan gapu ta saanen a nauram iti akin laud a paset ti balay babaen ti pannakasebseb ti apoy.
Innayon na nga agarup 386 a ribo a pisos ti balur dagiti nauram nga alikamen iti uneg ti pagtaengan agraman ti maysa a motorsiklo.
Immabot ti maysa oras ti panangsebseb dagiti kameng ti BFP iti uram agramanen ti overhauling no sadinno a sinigurado dan nga awan ti aggil-ayab iti pagtaengan. Nagpanawagan ni Ignacio a mauksot dagiti nakasaksak nga appliances nangruna no pumanaw dagiti agtagibalay.
