LAOAG CITY – Nabayagen a naireport iti City Engineering Office ti reklamo dagiti sumagmamano nga agdaldalyasat iti Brgy. Gabu Sur ditoy ciudad ti Laoag mainaig ti panangliklik da iti maysa a nangato nga alad gapu kadagiti agregreg a semento ken teppang ti hallowblock.
Daytoy ti inbatad ni Barangay Chairman Gil Ramos iti nasao a barangay.
Inadmitir na a nabayagen a madaddadael ti nasao nga alad a kukua ti Paul Ng ken masarakan iti abay ti kamposanto iti nasao a barangay.
Iti panagturong ti Bombo Radyo iti nasao a lugar, alad daytoy ti maysa a pakaipundoan dagiti agdan ti eroplano ken dadduma pay a makina ken ramramit.
Segun kenni Ramos, naireport na iti engineering office ti nasao nga alad iti kallabes ngem ti nagbalin a tignay ti engineering ket nangikabil da laeng ti garden soil iti babaen ti alad.
Inbatad na nga uray no adda ti agpunpon ket isu laeng ti sipsiputan da gapo ta amangan no adda ti maregreg a teppang ti alad.
Kalikagum ni Ramos a mabakbak kuma ti akin ngato a paset ti alad ken agpatingga iti kangatuan a biga na tapno awan iti panagamak dagiti agdaldalyasat.
Kabayatanna, marimaanen ti panagimbestigar ti Engineering Department ditoy ciudad ti Laoag mainaig iti nangato nga alad a pagam-amkan dagiti residente a dumaldalyasat iti nasao a lugar.
Segun kenni Engr. Roy Tomas, apaman a dimmanon ti nasao nga impormasyon kenkuana babaen iti Bombo Radyo ket nangibaon ti napan nangkita iti alad.
Inbatad na nga iti agdama ket birbiruken da ti pagtaengan ti agtagikua ti alad a ni Paul Ng babaen kadagiti opisyal ti Barangay 21 ditoy ciudad.
Kunana a daytoy ket tapno maikkan ti notice wenno surat ni Ng a masapol a marebba na ti alad gapo ta delikado kadagiti dumalyasat nga umili.
