LAOAG CITY – Dakkel ti nagngatoan ti fire incident a nairekord tiBureau of Fire protection ditoy Ilocos Norte iti bulan laeng ti Enero ken Pebrero ita a tawen.
Segun kenni Fire Chief Inspector Claire Simbol, ti Fire Marshal ti Bureau of Fire Protection-Ilocos Norte, idi 2022 ket adda laeng ti 17 nga uram ti nairekord iti kapada a bulan no sadinno 66% ti nagngatoan na ita a tawen gapo ta umaboten iti 50 ti uram a napasamak.
Inlawlawag na ti kangrunaan a rason ket ti dry season, pakairamanan pay ti open flame fire kadagiti agricultural waste, sigarilyo a maibebelleng sadinno man, electrical, overheated nga appliances, ken dagiti mapuuran a basura.
Mainaig iti daytoy, inbatad ni Simbol a manarimaan pay laeng ti imbestigasyon no anya ti namunganayan ti grass fire iti ili ti Solsona ken Piddig.
Kabayatanna, dinakamat na pay dagiti nagduduma a problema ti kas iti kinakurang ti firefighting equipment ken nabayag a pannakaiparuk-at ti impormasyon gapo iti nakapsot a signal iti bantay a pakapaspasamakan ti uram.
Innayon na a ti mabalin a solusyon ditoy ket ti panaggatang ti kagamitan para iti panangsebseb ti apoy, pannakainstular ti communication towers ken dadduma pay.
