LAOAG CITY – Inpasigurado ni Engr. Romeo Bartolome iti Department of Public Works and Highways, 1st Engineering District a naan-anay a matarimaan ti rangtay iti Barangay Pila ditoy ciudad ti Laoag sakbay nga agngudo ita a tawen.
Inlawlawag ni Bartolome a ti proyekto ket nailungalong idi 2023, sakbay ti iduduprak ti Bagyo Egay.
Kuna na nga idi rugyan da a tubtuben ket nakita da nga adda ti naperdi iti sirukna gapu ta naiyanud ti naigabor ken nadadael ti slope protection na.
Nupay kasta, kuna na nga iti agdama ket madalananen ti lugar ngem saan da pay masemento gapu ta saan pay a nasedsed ti daga.
Inpakaammo na a no masedsed ti daga ket natibtibker metlaeng ti base na.
Mainaig iti daytoy, inpasigurado ni Bartolome nga iti umuna a lawas ti Agosto ita a tawen ket mabalin a rugyan danton ti mangpasemento ti dalan iti nadakamat a lugar.
