LAOAG CITY – Inlawlawag ni Engr. Glen Miguel, District Engineer ti Department of Public Works and Highways – First District Engineering Office a napinpintas ti aspalto maidasig iti konkreto a kalsada.
Segun kenkuana, no aspalto ti kalsada ket saan unay a madlaw no adda dagiti rikki iti panagdalyasat dagiti motorista.
Inbatadna a nanginngina ti aspalto no maidasig iti konkreto a kalsada ngem al-alisto laeng ti pannakatarimaanna daytoy no adda dagiti paset a masapol a matarimaan.
Inlawlawagna a no ti konkreto a kalsada ket masapol pay ti dua a lawas a maiyuray sakbay a mabalin manen a madalyasat para kadagiti motorista.
Kunana a ti dakkel a karit para iti aspalto a kalsada ket ti danom a masapol nga insigida a maiturong kadagiti drainage canal tapno saan a madadael ti kalsada.
