LAOAG CITY – Napalaos ti ragsak ken panagyaman ti maysa kadagiti delegado ti Philippine Institute of Certified Public Accountants (PICPA) gapo iti pannakaisubli dagiti dua a cellphone na a nabati na iti nagluganan na a tricycle.
Segun kenni Ms. Everlaine Domingo manipud idiay ciudad ti Davao, naggapo iti maysa a psdek negosyo ditoy ciudad ken ditoy a sinada na ti tricycle nga addaan ti plate number a 0766 nga inturong ni Mr. Jomar Luzano, taga Barangay 23 ditoy ciudad.
Inlawlawag na nga idi bumaba iti City Hall ditoy ciudad ket nadlaw na nga awanen dagiti dua a cellphone na.
Nupay kasta, kunana a saan a nagnerbyus gapo ta ammo na a maisubli kenkuana dagiti cellphone na ken agtalek a dagiti Ilokano ket ammo da ti agisubli ti banag a saan da a kukua.
Inbatad na a dagus met laeng a naisubli kenkuana dagiti cellphone na kalpasan nga inpaima ni Luzano dagitoy iti PNP Traffic Division.
Naamoan a ti ama ni Domingo ket tubo ditoy probinsya.
