LAOAG CITY – Agtultuloy ti panagsangpet ti tulong idiay Myanmar manipud kadagiti nagduduma a pagilian kalpasan iti idadayyeg ti magnitude 7.7 a ginggined.
Naammoan a dagiti sumagmamano a nangipatulod ti tulong ti taraon ken dagiti volunteers ket manipud idiay China, Malaysia, Singapore ken Russia.
Ipayal-alisto ti United Nations dagiti relief supplies kadagiti survivors iti central Myanmar.
Inrakurak met ti Estados Unidos a mangipaay ti $2-milyon a tulong para kadagiti biktima ti ginggined.
Nagpanawagan ti United Nations Special Envoy on Myanmar Julie Bishop kadagiti military junta a mangidadaulo idiay Myanmar a padalyasatenda dagiti tulong para kadagiti biktima ti ginggined.
Maipalagip a dumanonen iti 2,065 dagiti pimmusay ken agarup uppat a ribu dagiti nasugatan pakairamanan ti 270 a mapukpukaw gapu iti napigsa a ginggined idiay Myanmar.
Immuna iti daytoy, inpatungpal ti Myanmar ti maysa a lawas a panagladladingit gapu iti napasamak a ginggined.
