LAOAG CITY – Inrakurak ti maysa a nangato nga opisial ti Israel a nangato latta ti porsiento dagiti Palestinian a saan pay a nagibakwit no sadinno a 10% pay laeng iti maysa a milyon a residente ti Gaza City ti nagibakwit wenno sumurok-kumurang 70 a ribu nga indibidual.
Basar iti report, mapagsasaritaan ti plano ti Israel nga isardeng dagiti humanitarian airdrops idiay Gaza City ken kissayan ti panagserrek dagiti truck dagiti taraon iti paset ti Gaza Strip a gagem daytoy a piliten dagiti tattao nga agibakwiten.
Iti napalabas a bulan, inpakaammo ti Coordination of Government Activities in the Territories (COGAT), ti departamento a mangimaton iti ayuda a mangipaay daytoy kadagiti tolda para kadagiti Palestinian sakbay nga iyakar dagitoy iti abagatan a paset ti Gaza.
Nupay kasta, sipod idi Martes, tallo a ribu a tolda pay laeng ti naiserrek, adayo iti target a 100 a ribu iti uneg ti tallo a lawas.
Kabayatanna, palawaen ti Estados Unidos ken Israel dagiti distribution site ti kontrobersial a Gaza Humanitarian Foundation (GHF) manipud iti uppat iti 16 a bilang.
Immuna iti daytoy, adu pay a residente idiay Gaza City ti agkedked nga agibakwit gapu ta ad-adda a pilienda a matay iti bukudda a pagtaengan maidasig iti maminsan manen a mapatalaw iti teritorioda.
