LAOAG CITY – Nanayunan manen ti pakaluksawan ni Mayor Richard Degala iti ili ti Vintar kalpasan a naduktalan na a nakaad-ado nga agas nga expired ti naipenpenpen iti Municipal Health Office iti nasao nga ili.
Inpetteng ti Mayor a nakaad-ado dagiti gumawgawa a kailian na ti agas ngem nasaysayang laeng dagitoy.
Inpalgak na a basar iti palawag kenkuana ti Municipal Health Office ket ado dagiti agas manipod iti Department of Health a dandanin ti panag-expired na idi naawat da.
Nupay kasta, inpetteng ni Mayor Degala a masapol nga inbunong koman a dagus dagiti maseknan dagiti agas a dandanin panag-expired na tapno saan a nasayang dagitoy.
Gapu iti daytoy, kalikagom ti Mayor no apay a saan a naibunong a dagus dagiti agas sakbay a nadanun ti expiration date da.
Kabayatanna, ginandat ti news team ti Bombo Radyo Laoag nga alaen ti kabibiangan ti Municipal Health Officer iti ili ti Vintar a ni Doctor Hiedy Marita Albano ngem nagkedked a nagpainterview.
Inbatad na laeng a nakaipaayen ti palawag na ken ni Mayor Degala ken aniaman ti agbalin a pangngeddeng ti chief executive ket nakasagana a mangsango.
Nadakamat pay ni Albano nga adda ti kamali dagiti empleado na gapu ta basta da lattan agkaot kadagiti agas a saan da a kinitkita no addan dagiti dandani ag-expired, ngem kas Municipal Health Officer responsibilidad na latta no ania ti nagkurangan dagiti adda iti babaen na.
