LAOAG CITY – Naruay nga illegal campaign poster materials ti naikkat iti umuna nga aldaw ti panagkampania dagiti local candidates.
Segun ken ni Atty. Julius Balbas, Election Officer ti Commission on Elections ditoy siudad ti Laoag, nagbalin a balligi ti pannakaiwayat ti Nationwide Operation Baklas ditoy siudad ita nga aldaw.
Inbatadna nga adu kadagiti campaign poster materials dagiti kandidato ti naikabil iti saan a naikeddeng a common poster area.
Gapu iti daytoy, inlawlawagna a saanda a nagpangadua nga insigida nga inikkat dagitoy tapno saan a tuladen dagiti dadduma.
Kunana a nangrugida iti paset ti Central School kalpasan a naobserbaranda nga adu dagiti naipan nga illegal campaign poster materials.
Malaksid iti daytoy, inpakaammona a naglikosda pay iti bypass road ken dagiti kangrunaan a barangay ditoy siuda ti Laoag.
Innayonna a mangipatulodda ti surat kadagiti kandidato a nairaman kadagiti illegal campaign poster materials ngem no saandanto pay a sumurot iti pagannurotan ket pilaanda ti kaso dagitoy.
Kabayatanna, naammoan a dagiti inikkatda nga illegal campaign poster materials ket maibasura tapno saanen a mausar pay dagitoy.
