LAOAG CITY – Natay dagiti 20 a karnero ken uppat a kalding a taraken ni Mr. Carmelito Labayog y Pascual, agtawen ti 70, residente iti Barangay Navotas-B ditoy ciudad ti Laoag.
Kinumpirmaran daytoy ni Barangay Chairman Hector Cristobal iti nasao a barangay.
Segun kenni Crsistobal, basar kenni Labayog ket saan na a nadlaw nga adda ti mapaspasamak kadagiti taraken na iti nagpatnag.
Inbatad na nga iti bigat ket nakita laengen ni Labaypg dagiti taraken na a nagkaiwara ken naburayrayan ngem awan pulos ti dara iti nakapupukan dagiti dingwen.
Inlawlawag na a ti atapen ti akin-taraken ket aso ti akin-aramid ti nasao a pasamak ngem kunana nga awan ti nangeg ti agtagikua a tagari.
Kunana nga uray iti kabangibang da a barangay ket adda ti kastoy a pasamak.
Kabayatanna, patyen ni Mr. Esteban Piddis, residente ti Barangay Lagui-Sail ken tubo ti Barangay Navotas ditoy ciudad ti Laoag a maysa nga aso ti agpatpatay kadagiti taraken a kalding ken karnero.
Daytoy ket gapo ta iti kallabes ket nabiktima met dagiti dua a kalding na.
Segun kenkuana, ti akin-aramid ti pasamak ket maysa a dakkel nga aso a ti ulo na ket kas arig na kas kadakkel ti ulo ti tao.
Inlawlawag na nga idi nakita da daytoy ket kinamat da ngem nakaadayo kalpasan a linagto na ti inaladan a nakapupukan dagiti taraken na.
Kunana a ti nangisit nga aso nga akin-aramid kadagiti mapaspasamak ita kadagiti agkakarubba a barangay ket arig na linuganan ti aswang.
