LAOAG CITY – Inpetteng ni Atty. Joseph Apolonio, Provincial Director ti National Police Commission a nasken a saan laeng nga agtugtugaw dagiti pulis nga adda iti PROTECT Box.
Segun kenkuana, masapul a saan laeng a maipakat ti police visibility no diket kasapulan met a marikna ti presensia dagitoy tapno ad-adda a maiyasideg ti kinatalged dagiti umili ken komunidad.
Inbatadna nga adda dagiti maiwaywayat a panag-monitor wenno inspeksion kadagiti naka-duty wenno naka-deploy a pulis tapno maipasigurado a saan dagitoy a matmaturog, agay-ayam iti cellphone ken dadduma pay.
Inlawlawagna a magutgutigot dagiti kapulisan nga imbes a kanayon a nakatugaw iti PROTECT Box ket nasaysayaat no mapanda bayabayan dagiti estudiante iti kalsada nga agturong iti pagadalan.
Mainaig iti daytoy, inpakaammo ni Atty. Apolonio a gagem ti Philippine National Police nga ad-adda pay a mapatibker ti relasion iti nagbaetan ti kapulisan ken komunidad maipapan iti panagsolbar kadagiti nagduduma a reklamo wenno insidente.
Innayonna nga awan ti serserbina ti 911 hotline ken dagiti police patrol no saan met laeng nga alerto wenno aktibo dagiti naka-duty a kameng ti nailian a pulisia iti panagresponde kadagiti pasamak.
