LAOAG CITY – Inpakaammo ni Atty. Julius Balbas, Election Officer ditoy siudad ti Laoag nga adda ti 110,322 a botante ditoy siudad a manamnama nga agbutos para iti Barangay ken Sangguniang Kabataan Elections intono Oktubre 30 ita a tawen.
Segun kenkuana, manipod iti nasao a bilang ket adda ti 85,622 a botante para iti Barangay Elections idinto nga adda ti 24,700 nga agbutos iti Sangguniang Kabataan Elections ditoy siudad ti Laoag.
Inbatadna a naurnusen ti listaan dagiti botante ditoy siudad gapu ta naikkaten dagiti nagan dagiti botante a natayen pakairamanan dagiti maibilang a double registrants nga umabot iti 393.
Kunana a dagiti botante nga agtawen ti 15 agingga 17 ket agbutos laeng dagitoy para iti Sangguniang Kabataan Elections idinto a dagiti agtawen ti 18 agingga 30 ket mabalin dagitoy nga agbutos iti agpada a Barangay Elections ken Sangguniang Kabataan Elections.
Inbagana a mangrugi ti panagipila ti Certificate of Candidacy intono Agosto 28 agingga Septiembre 2 iti oras ti alas otso ti bigat agingga ala singko ti malem iti Commission on Elections Office ditoy siudad.
Inlawlawagna nga apaman a makaipasa ti kandidatura dagiti agpaidasig ket naiget a maipawil ti dagus a panangiyuswat ti panagkampanya gapu ta naituding daytoy intono Oktubre 19 agingga 28.
Kunana a kagiddan ti panagipila ti kandidatura ket ditoy met a mangrugi ti naiget a pannakaipatungpal ti Commission on Elections gun ban.
Inpaganetget ni Atty. Balbas nga awan ti substitution ti Barangay Elections maidasig iti Local and National Elections nga adda ti substitution a mapaspasamak.
Nupay kasta, inpalgakna a mapalubusan laeng ti substitution iti Barangay Elections no pimmusay ti maseknan a kandidato no sadino ti mabalin laeng a mangsukat ket ti asawana wenno kapadana iti apelyido.
Mainaig iti daytoy, inpakaammo ni Balbas dagiti kwalipikasyon dagiti agpaidasig iti Barangay Elections no sadino ket nasken a maysa a citizen ditoy Pilipinas, registered voter iti Barangay a paka-elektaranna, residente iti Barangay ti saan a nababbaba ngem maysa a tawen, kabaelanna ti agbasa ken agsurat ti Filipino wenno aniaman a lengguahe wenno dayalekto a pagsasaona ken nasken laeng nga agtawen ti 18 wenno agpangato.
Innayonna a dagiti kwalipikasyon met para kadagiti agpaidasig iti Sangguniang Kabataan Elections ket nasken a maysa a citizen ditoy Pilipinas, residente iti Barangay ti saan a nababbaba ngem maysa a tawen ken agtawen ti 18 agingga 24.
Kabayatanna, ginutigot ti Laoag City Election Officer dagiti maseknan nga agkalikagum nga agpailayon a makipaset iti Barangay ken Sangguniang Kabataan Elections Forum inton malem iti oras ti ala una y media ti malem iti City Auditorium.
