LAOAG CITY – Inbatad ni National Capital Region Police Office (NCRPO) a nasurok 16,000 personnel ti nakasagana a maideloy para iti November 30 anti-corruption rallies iti Metro Manila.
Segun kenni NCRPO spokesperson Police Major Hazel Asilo, nakasaganan ti 16,670 personnel a maiwaras iti intero a Metro Manila tapno pagtalinaed ti kapya nangruna kadagiti namonitor da a pagtitiponan dagiti tattao intono bigat.
Inlawlawag na a dagiti nadesignaran a angsango kadagiti raliyista ket awan ti armas nga iggaman da no diket shields ken batons laeng.
Nupay kasta, kadagiti met mangipaay t perimeter security ken arresting officers ken addaan ti armas ken posas.
Kunana pay a paigetan da ti seguridad kadagiti lugar a saan a nakaala ti rally permits ken iti met Liwasang Bonifacio a maysa a freedom park ket saan a kasapulan ti permit.
Inpetteng na pay a ti Mendiola idiay Manila ket saan a mabalin nga isu ti pagtitiponan iti aniaman a pasken.
Kabayatanna, binalakadan na ti publiko a saan a mabalin nga agitugot ti armas, kutsilyo, clubsticks, paputok wenno hazardous materials, drones a ti PNP laeng ti mapalubusan ken dadduma pay.
Mapatta-patta a 120,000 a tattao ti makipagpaset iti Trillion Peso March iti EDSA People Power Monument.
