LAOAG CITY – Kinumpirmaran ni Mayor Joseph de Lara iti ili ti Solsona nga adda ti nainayun a barangay a naapektaran ti African Swine Fever (ASF).
Daytoy ket partikular iti Sitio Sta. Ana iti Brgy. Catangraran iti nasao nga ili.
Gapu iti daytoy, kuna ni de Lara a nanayunan ti nasurok 200 a baboy ti bilang dagiti naikali iti napalabas nga aldaw.
Inbatad na a posible a ti namunganayan ti virus iti nasao a barangay ket ti danom nga aggapo iti Brgy. Maananteng, ti barangay nga immuna a naapekataran ti ASF.
Kabayatanna, inlawlawag ni de Lara nga awanen ti sabali pay a sitio iti Brgy. Catangraran ti nairaman iti 500 radius.
Mangnamnama ti mayor a saanen a manayunan pay ti kaso ti ASF iti ili ti Solsona.
