LAOAG CITY – Inadmitir ni Mr. Louie Andres iti Brgy. Caaoacan ditoy ciudad ti Laoag nga awan ti umno a dokumento dagiti ilaklako na a karne ken saan a dimmalan iti slaughter house dagiti karne a nakumpiskar manipod kenkuana.
Segun kenni Andres, maysa baboy ti pinarti da itay parnbangon ngem saan dan a pinaeksamin pay ti ante ken post mortem examination babaen kadagiti meat inspectors ditoy ciudad.
Inlawlawag na nga ammo na a maiparit ti kastoy nga aktibidad ngem gapo ta kellaat ti panagparti da itay parbangon ket isu metten ti rason no apay a saan dan a napanunutan nga ipa-eksamin ti baboy a pinarti ken ti karne nga inlako da.
Naamoan a daytoyen ti maikadwa a daras a naaramid ni Andres ti kastoy ngem saan a nasitar iti ummuna a nagparti.
Ummuna iti daytoy, adda ti nakakita a pulis nga aglaklako da Andres rason a sinitar na ken dinawat na ti dokumento ngem awan ti naipakita ti maseknan isut gapo na a tinawagan na ni Dr. Loida Valenzuela, povincial veterinarian.
Inbatad na nga inbilin kenkuana ni Valenzuela nga i-hold na ni Andres ken ti kadwa tapno maiyuswat ti beripikasyon kadagiti nadakamat a karne.
Mainaig ti daytoy, inbatad ni Dr. Arthur Cabello, city veterinarian ditoy ciudad ti Laoag a mabalin a kanen dagiti karne a nakumpiskar malaksid laeng iti dalem gapo ta nakitaan da ti white spots ti nasao a parte ti baboy.
Daytoy ti rason a naipan laengen iti INPJ dagiti nakumpiskar a karne tapno agserbi a taraon kadagiti PDL’s ti nasao a pagbalodan.
Innayon ti opisyal nga amin a klase ti karne ket masapol a dumalan iti ante ken post mortem examination tapno masigurado a natalged dagiti karne a kanen dagiti consumer.
Maipalagip nga umabot ti nasurok 38 a kilo ti karne ti baboy ti nakumpiskar itay laeng bigat iti nadakamat a barangay.
