LAOAG CITY – Inbatad ni Mr. Marcel Tabije, mangidadaulo ti Provincial Disaster Risk Reduction and Management Office nga umaboten iti nasurok 400 a milyon a pisos ti inisyalen a balor dagiti nadadael iti imprastraktura gapo iti Super typhoon Goring.
Segun kenni Tabije, dagiti nadadael ket ummunan a naperdi idi dimmuprak ti Bagyo Egay ken kimmaro dagitoy gapo iti Super typhoon Goring.
Inpakammo na pay nga umaboten iti 42 a pamilya ken 136 nga indibidual ti naibakwit manipud iti ciudad ti Batac, ili ti Banna, Dingras, Bangui, Piddig, Bacarra ken Paoay ngem posible a manayunan pay daytoy.
Agpapan maisursurat ti damag ket awan met ti naipadanon iti opisina na nga adda ti nasugatan wenno mapukpukaw a kaprobinsyaan
Mainaig iti daytoy, kunana a madalanan met dagiti amin a national highway iti Ilocos Norte ngem one lane iti Barangay Pancian iti ili ti Pagudpud gapo iti panagreggaay ti daga.
Nupay kasta, inpasigurado na a naka-standby dagiti amin nga equipment ti Dept. of Public Works and Highways 1st Engineering District.
