LAOAG CITY – Balligi a natiliw ti cashier ti Auto Bee Gas Station iti Barangay Balatong ditoy ciudad ti Laoag kalpasan nga intaray na ti 59,173 a pisos a naglakoan ken ti maysa a motorsiklo a kukua ti pada na nga empleado.
Nabigbig ti suspek a ni Ahmer John Cainglet a residente iti Barangay Gabut Sur iti ili ti Badoc idinto a ti agtagikwa iti gas station a ni Mr. Robert Sagisi.
Segun kenni Sagisi, mapan agala iti koleksyon ngem idi nakadanon iti nasao a gas station ket awanen ti cashier rason a nagdamag iti pump attendant a nakaduty ken ditoy a naduktalan na nga iti alas-diyes iti bigat, Mayo 21 ket pimmanaw ti suspek ken nagsubli laeng iti malem.
Kunana a ditoy metten a naamoan na nga innala ti suspek ti kwarta ken ti inbaga na iti pump attendant ket i-remit na ti kantidad iti Main Office da ngem inpetteng ni Sagisi nga awan ti inbilin na a kastoy.
Inlawlawag na nga idi saan nan a mauray ti suspek ket inbilin na iti head ti cashier/manager a mapan iti gas station ken adda metten ti suspek ngem idi nakita daytoy dagiti inbaon na ket dagus a naglibas tugot ti kantidad a naglugan iti motorsiklo ti pump attendant.
Mainaig iti daytoy, kunana nga iti kallabes ket addan dagiti nadukduktulan na kadagiti empleado na a mangitartaray iti kwarta manipud iti gas station da.
Inpetteng na a kumpleto met ti benipisyo dagiti empleado.
Kabayatanna, desidido ni Sagisi a mangipila ti reklamo kontra iti suspek.
