LAOAG CITY – Dakkel ti pammati ti Bureau of Customs (BOC) ken ti Department of Agriculture (DA) a posible nga agur-uray dagiti importer ti bagas a ngumato ti presio ti bagas sakbay nga iruarda dagiti stocks no sadinno nga adda ti siam a milyon a kilo ti bagas a nakapenpen kadagiti 356 container vans ti naka-stock iti Manila.
Basar iti report, naikkan ti 30 nga aldaw dagiti importer tapno iruar dagiti stocks apaman a maawatda ti clearance manipud iti Bureau of Customs sakbay a maideklara nga abandonado.
Inbatad ni Customs Assistant Commissioner Jet Maronilla, posible a gungundawayan dagiti importer ti bagas ti nasao a pagannurutan.
Saan met pay a masinunuo ti Agriculture Department no ania ti aramiden kadagiti agang-angkat ti bagas ngem kuna ni Department of Agriculture Assistant Secretary Arnel de Mesa a inlawlawag kadakuada ti Philippine Ports Authority (PPA) a mabalin nga agur-uray ti napintas a presio dagiti agang-angkat ti bagas sakbay nga iruarda dagiti stocks-da.
