LAOAG CITY – Nasurok a 10 milyon a pisos ti deperensya ti general fund ti lokal a gobierno ditoy ciudad ti Laoag sipod idi Enero agingga ti bulan ti Hunyo ita a tawen.
Inbatad ni Vice Mayor Vicentito Lazo a ti nakasurat iti libro ti accounting office ket P403,960,645 ti general fund idinto a ti nakaipan iti bank statement ket P414,021,378 rason a nasurok a 10 milyon a pisos ti diperensya dagiti dua a ledger.
Inlawlawag ni Ms. Louellyn Acain, Accounting Staff ken mismo a nagaramid ti reconcillation ti Bank Account ken libro ti Accounting Office ditoy ciudad a ti nasao a deperensya ket ti naisyu nga outstanding cheque kadagiti supplier iti lokal a gobierno.
Naamoan a dagiti sumagmamano a pasdek ket saan da pay a nai-encash wenno naideposito iti bangko da.
Rumrumuar nga adda pay ti sapsapulen ni Lazo a diperensya nga agarup maysa a milyon a pisos.
Innayon ni Acain a kasapulan ti resibo gapo ta agserbi daytoy nga ebidensya nga adda ti naideposito iti bangko.
