LAOAG CITY – Nasurok a 1,400 nga indibidwal ti naasistiran ti Philippine Red Cross (PRC) ita nga Abril 2, iti oras ti alas-7 ti bigat iti baet dagiti napaigetan nga operasyon ita a Semana Santa.
Iti pakabuklan, adda ti 1,412 a tattao dagiti nairekord a serbisyo medikal, no sadinno a 1,335 ti dimmalan iti vital signs monitoring.
Adda met ti 64 a kaso ti minor medical concerns kas ti gasgas, panagkapsot, litem, pannakaulaw, LBM, pannakablo, panagsaksakit ti buksit ken dadduma pay.
Umabot met iti siyam ti nairekord a major cases karaman ti hypertension, nakaro a panagsaksakit ti buksit ken pannakabagkong.
Uppat dagiti kasapulan a naitaray iti ospital gapu kadagiti insidente nga adda ti pakainaigan iti ado a perdisyon, pannakatnag, napukawan ti poot ken panaglaslas.
Malaksid iti medikal, adda pay ti walo a nairekord a welfare assistance: tallo a referral ken lima a wheelchair assistance.
Tapno masolusyonan ti kasapulan ti publiko, nagiwaras ti PRC ti 32 nga ambulansya, maysa a mobile clinic, 109 first aid stations, 23 welfare desks, 18 foot patrols, ken pakabuklan a 2,000 a personnel manipod iti staff ken volunteers.
Sakopen ti operasyon ti 135 a lugar karaman ti simbaan, highway, pantalan, beach, bus terminal, mall, pagadalan, parke, pilgrimage sites, barangay hall, command post, events place, gasolinaan, train station, ken AOR.
