LAOAG CITY – Kinumpirmaran ni Brgy. Chairman George Ramos iti Brgy 9 iti ili ti Sarrat nga adda ti maipagarop a tinakaw ti brgy. treasurer da a nasurok a 5-milyon a pisos manipod iti pondo ti barangay.
Inbutaktak na daytoy kabayatan ti naisayangkat a general assembly iti nadakamat a barangay nga inatendaran dagiti opisyales ti barangay, sumagmamano a residente ken ni dati a Bise Mayor Edito Balintona.
Segun kenkuana, naduktalan da ti inaramid ti barangay treasurer a binigbig na a ni Johnteine Roque idi bulan ti Agosto ita a tawen kalpasan nga awan ti honorarium a maawat dagiti opisyal ti barangay.
Inlawlawag ti kapitan a kinuyog na ti barangay treasurer tapno mapanda ipasukat dagiti tseke nga usaren da iti barangay da ngem inbatad ti verifier ti bangko a mapukpukaw ti tseke para iti honorarium.
Gapo iti daytoy, saan a natuloy ti pannaka-encash ti cheque ken inpadas da a saraken daytoy iti kalsada nga asideg ti brgy. hall iti pammati a napukaw daytoy.
Nupay kasta, idi saan da latta a masarakan ket nagdesisyonan ti kapitan ken treasurer nga ipa-cancel daytoy tapno maka-issue ti baro a cheque.
Inbatad ti kapitan a nagtalek iti treasurer isut gapu na a nangisyu ti baro a cheque ngem kalpasan iti daytoy ket awan latta ti mauray da a sweldo da isut gapuna a nagbalaw ken nagturong iti bookeeper ti barangay.
Naibalakad iti kapitan a mapan iti bangko tapno agkiddaw ti rekord ti estado ti pondo ti barangay ket ditoyen a naduktalan na a bassiten ti nabati a pondo ti barangay da.
Inrakurak ti kapitan nga iti panangpaayab da iti treasurer da ket inpudno na nga inbulsa na ti pondo ti barangay.
Innayon na a basar iti rekord ti Commission on Audit ket enero 2024 paylaeng idi rinugyan ti treasurer ti nagala ti pondo ti barangay .
Kabayatanna, kalikagom ti barangay a mapasubli amin ti napukaw a pondo da kalpasan nga addan sumurok kumurang a 770,000 a pisos ti naited ti maseknan.
Nupay kasta, kadagitoy a gundaway ket saandan a masinunuo no sadinno ti ayan ti barangay treasurer da.
kabayatanna, inbatad ni dati a Bise mayor Edito Balintona a malaksid iti pannakaisubli ti natakaw a pondo ti barangay ket rumbeng a mapatawan ti pannusa kangrunaan na ti criminal liability ken administrative liability ti barangay treasurer.
Ti dati a bise mayor ket isu ti innala nga abogado ti nadakamat a barangay.
