LAOAG CITY – Nasurok a 890,000 a food pack ti naiwaras kadagiti biktima ti bagyo iti intero a pagilian kalpasan ti iduduprak ti Severe Tropical Storm Kristine ken Super Typhoon Leon segun iti Department of Social Welfare and Development (DSWD).
Iti public briefing, kinuna ni Department of Social Welfare and Development Assistant Secretary Irene Dumlao nga agingga idi Oktubre 31 a nawarasan da dagiti naapektaran a local government units (LGUs) iti food pack.
Malaksid iti daytoy ket adda pay nasurok a 1.3 milion a balor ti food packs a nai-preposition para kadagiti biktima.
Iti agdama ket agtultuloy ti panangitulod ti ahensya kadagiti food packs kadagiti naapektaran a lugar.
Immuna metten a nagpalgip to ahensya kadagiti lokal a gobierno a mabalin da nga usaren ti calamity fund da kas panangsupusop ito kasapulan ti lugar da, nangruna kadagiti lugar a nakaru a naapektaran.
