LAOAG CITY – Inbatad ni Mayor Albert Chua a ti sangailien da para iti Palarong Pambansa 2025 ket dagiti delegasyon manipod iti Region 4-A (Calabarzon wenno Cavite, Laguna, Batangas, Rizal, and Quezon)
Segun iti mayor, adda ti uppat a pagadalan a pagtalinaedan dagiti delegado wenno billeting areas iti ciudad kas iti Hilario Valdez Elem School, Poblacion National High School, Mariano Marcos Elem School ken iti Catalino Elem School.
Kuna na a nasurok a sangaribo a delegado ti sangailien da no sadinno a nakasaganan ti iyuswat da a welcome party para kadagitoy.
Inpakaammo ti mayor a ti Region 4-A ket addaan ti nasurok a 20 a division ken daytoy ti maibilang a kadakkelan ti delegasyon manipod iti 18 a rehiyon a makipaset iti Palarong Pambansa 2025.
Inlawlawag na pay a karaman kadagiti maisayangkat a paay-ayam iti ciudad ti Batac ket ti boxing a maiwayat iti Imelda Cultural Center, idinto a ti Football, Tennis, Futsal, volleyball, chess ket iti Mariano Marcos Elem School.
Mainaig iti daytoy, inpasigurado ni Mayor Chua ti kinatalged dagiti sangaili babaen ti naiget a panagbantay dagiti kameng ti City Disaster Risk Reduction and Management Council, Philippine National Police, Philippine Army. Philippine Coastguard, Barangay Tanud, ken dadduma pay.
Innayon na nga adda pay ti ipatulod ti dadduma a lokal a gobierno ditoy probinsya tapno mapan tumulong para iti panangkita met ti salun-at dagiti atleta a makipaset iti Palarong Pambansa.
Kabayatanna, inpakaammo ni Mayor Chua nga adda ti inyalokar da a 3 milyon a pisos para iti nasao nga aktibidad.
