LAOAG CITY – Umabot iti 2375 ti bilang dagiti umili a nabenepisyaran ti medical, optical, dental ken dadduma pay a serbisyo ti Bombo Medico ti Bombo Radyo Philippines a naiyuswat ditoy ciudad ti Laoag.
Immuna ti daytoy, naggigidan nga insayangkat ti Bombo Medico 2019 manipod iti 24 a lugar ditoy Pilipinas nga adda ti Bombo Radyo ken Star FM stations .
Nangipaay ti Bombo Medico ti libre nga agas para kadagiti addaan ti sakit, libre a panagpagabot ti ngipen ken dadduma pay a serbisyo para kadagiti umili.
Daytoy ket kalpasan ti maika 53 tawen nga anibersaryo ti Bombo Radyo Philippines manipod idi tawen 1966.
Malaksid iti 458 a bilang ti naipaayan ti serbisyo a medikal, agarup 210 ti naka-avail ti dental services, 502 ti naikkan ti serbisyo nga optical, idinto a 750 ti nakaawat ti libre a serbisyo kas ti panagited ti pustiso, hearing aids, arm prosthetics, wheelchairs, crutches, reading glasses, karaman pay ti prostate screening, ken minor surgery harlip, cleft palate ken hernia.
Adda pay ti legal services, feeding program, naduma-duma a lectures pangged ti salun-at ken pangipaay ti dental kits, libro ken tsinelas ken dadduma pay.
Umabot ti maysa milyon ti balor ti libre a konsulta, panagpagabot ti ngipen, ken dadduma pay a serbisyo babaen kadagiti espesyalista a doktor, dentista ken allied health professionals ti boluntaryo a nangipaay ti oras ken serbisyon da tapno tumulong kadagiti umili.
Ti naiyuswat a simultaneous nationwide medical, optical ken dental mission ket maysa kadagiti programa a binukel babaen ti chairman ti Bombo Radyo Philippines a ni Dr. Rogelio M. Florete tapno tulungan dagiti nakurapay nga umili ken kas paset ti corporate social responsibility.
Adda pay ti sabali a proyekto ti network a maisaysayangkat kas ti Dugong Bombo iti kada Nobyembre. Ti simultaneous blood letting activity kadagiti Bombo Radyo ken Star FM stations iti intero a pagilyan ken ti Bombo Music Festival a para kadagiti composers, lyricists ken singers ti OPM Music ket maisangsayangkat ti kada Enero.
Ti nagballigi manen a Bombo Medico ket babaen kadagiti sponsors kas ti Morifer, Filipino Indian Chamber of Commerce Incorporated ken ti Department of Health.
Karaman kadagiti 24 a lugar a nakaisayangkatan ti Bombo Medico 2019 ket pakaibilangan ti ciudad ti Manila, Tuguegarao, Cauayan, Laoag, Vigan, La Unio, Dagupan, Baguio, Naga, Legazpi, Bacolod, Iloilo, Roxas, Kalibo, Cebu, Tacloban, Davao, General Santos, Butuan, Koronadal, Cotabato, Dipolog, Cagayan de Oro ken Zamboanga City.
Iti nagan ti management ken staff ti Bombo Radyo Philippines, agyaman kami kadagiti sponsors, doctors, dentists, pharmacists, nurses, medical staff ken dadduma pay a volunteers a nakipaset ti Bombo Medico 2019.
