LAOAG CITY – Inpannakkel ni Police Colonel Frederick Obar, ti Provincial Director iti Ilocos Norte Police Provincial Office a dumanon iti 870 nga indibidual ti naikkan ti citation ticket manipod kadagiti nagduduma nga ili ken siudad ditoy probinsia gapu iti panaglabsingda kadagiti maipatpatungpal a traffic ordinance.
Segun kenkuana, adda ti 354 a naisayangkat a checkpoints iti las-ud ti makalawas iti intero a probinsia a mangipaneknek ti ad-adda a pannakapaigetda pay ti panangsalaknib iti seguridad dagiti umili.
Inbatadna nga adda ti nasurok-kumurang a kagudua a milyon a pisos ti nakolektarda a multa kadagiti traffic violators.
Malaksid iti daytoy, kunana nga adda pay ti natiliwanda babaen iti Enforcement Special Laws kas ti Anti-Illegal Gambling Operations, Anti-Illegal Drug Buy-bust Operation pakairamanan ti maysa a rebelde a simmuko a dati a kameng ti Communist Terrorist Group.
Innayonna nga agtultuloy latta ti ipatpatungpal a naiget a panagpatrolyada dagiti kapulisan nangruna kadagiti lugar a pagdudupudupan dagiti tattao.
