LAOAG CITY – Naawaten dagiti benepisyaryo ti Department of Agrarian Reform iti intero a rehiyon uno ti titulo ti taltalonen da a lote.
Naisayangkat daytoy iti Municipal Auditorium iti ili ti Vintar.
Nagturong a mismo a ni Agrarian Reform Secretary Conrado Estrella III ditoy probinsya tapno idaulwan ti pannakaibunong ti titulo ti daga kadagiti benepisyaryo iti rehiyon Uno.
Naamoan a ditoy Ilocos Norte ket adda ti 229 a benepisyaryo; 157 iti Ilocos Sur idinto a 148 iti La Union ken 143 iti Pangasinan.
Iti panagbitla ni Secretary Estrella, inpanakkel na dagiti naruay a tulong a naipaayen kadagiti mannalon kas kadagiti farm machineries ken equipments, abono, ken dadduma pay.
Malaksid kadagitoy, nadakamat pay ni Estrella dagiti napaaramid da nga ado a farm-to-market roads ken irigasyon.
Mainaig iti daytoy, naobserbaran ni Estrella a tumataengen dagiti mannalon isut gapuna a binalakadan na dagitoy a masapol a sursurwan dagiti annak wenno appoko nga agtalon tapno saan a mabaybay-an dagiti daga da.
Innayon na nga uray agbalin propesyonal aminen dagiti annak ken appoko ket masapol nga itultuloy koma latta ti agmula ken agtaraken kadagiti dingwen.
Kuna pay ni Estrella a no maisardeng ti panagtalon ket amangan no dumteng ti panawen nga agbisin dagiti Pilipino wenno mangnamnama lattan iti ipauneg a taraon iti sabali a nasyon.
Inpasingked met ni Estrella a nakasagana ti Department of Agrarian Reform a tumulong ken mangsuporta kadagiti mannalon iti pagilian.
Kabayatanna, inbatad ni Mr. Jojie Rumbaoa iti Barangay Namuroc iti ili ti Vintar a maragsakan unay iti pannakaawat dan ti titulo ti taltalonen da a daga, a nasurok a tallo a tawen nga inur-uray da.
Kuna na nga adda ti 4 nga ektarya a mulmulaan na ti pagay ken dagiti nateng.
