LAOAG CITY – Agdagup iti 305,287,000 a pisos ti naaprobaran a pundo para iti Ilocos Norte manipud iti gobierno nasional.
Impalgak ni Mr. Hashler Garalde, Social and Environmental Safeguard Focal Person ti gobierno probinsial a namunganay daytoy babaen iti panagkiddaw ni Gov. Matthew Marcos Manotoc ti pundo para iti pannakaipatungpal dagiti proyekto a makatulong iti panangmentiner ti napintas nga apit iti benneg ti agrikultura ken iti napintas a pannakaiwanwan ti aglawlaw.
Inlawlawagna nga iti iyuumay ti grupo ni Sec. Robert Borje ti Climate Change Commission ditoy probinsia ket inlungalong ti gobernador a mapundoan iti babaen ti People’s Survival Fund wenno PSF ti “Ilocos Norte Climate Resilient Intervention towards Sustainable Agriculture and Natural Resource Management”.
Imbatadna a kangrunaan a gagem ti proyekto ti panangiyestablisar kadagiti mabalin a pangalaan ti danum ken sistema ti irigasyon a mangpadur-as kadagiti produkto kadagiti taltalonan ken umado dagiti mabalin a pamastrekan.
Malaksid ito dayta, ket makatulong pay daytoy a mangpasubli iti kinabaknang ti daga babaen kadagiti nagduduma a ganuat iti panagtalon, mang-develop ken mangipatungpal kadagiti nasayaat a ganuat iti agro-forestry ken “watershed management” tapno mapasayaat ti pamastrekan dagiti nakukurapay ken nakakapuy nga umili ken mangiyestablisar iti “climate field school a mangipaay ti edukasyon ken panagsanay a mangpabileg kadagiti local government units iti panangmonitor ken panangtingiting iti kasasaad ti panawen ken mangipatungpal iti maiyannatup a ganuat a masapul a maadaptar iti benneg ti agrikultura.
Inbunannagna a mai-download ti nasao a pundo para iti probinsia iti babaen ti Development Bank of the Philippines wenno DBP.
Segun kenkuana, karaman kadagiti manamnama a pakausaran ti pundo ti pannakaipasdek dagiti Small Water Impounding Project, solar irrigation system, Small Farm Reservoir ken dadduma pay.
Kabayatanna, ti nasao a programa ket maipatungpal iti uneg ti lima a tawen a manamnama nga ad-adda pay a mangpabileg iti probinsia.
