LAOAG CITY – Inbatad ni Vice Mayor Francis Espiritu iti ili ti Dumalneg nga adda ti panagsarita da kenni Gov. Matthew Marcos Manotoc mainaig iti alegasyon na kadagiti sumagmamano a miembro ti junta probinsyal.
Namunganay daytoy iti pannakaipataw kenni Espiritu ti 60-day preventive suspension gapo pay laeng iti maipagarop a panangdangran na iti maysa a residente.
Segun kenni Espiritu, inbaga na amin kenni Gov. Manotoc dagiti alegasyon na partikular ti maipagarop a panangdawat kenkuana ti 300 a ribo a pisos ni Sang. Panlalawigan Member Domingo Ambrocio kasukat ti saan na a pannakasuspenso.
Inlawlawag na a ti nagbalin a sungbat ni Manotoc kenkuana ket i-review wenno adalen ti gobernador daytoy nga isyu.
Mainaig iti daytoy, kuna ti bise mayor nga adalen da a nalaing iti legal counsel na ti sumaruno nga addang da kontra kadagiti ummunan nga innaganan na nga opisyal a maipagarop a dumawdawat ti kantidad kenkuana.
Inpetteng na a masapol a maisardeng ti kastoy nga aramid dagiti adda iti junta probinsyal a maipagarop a mapaspasamak iti kallabes.
Daytoy ket gapo ta no saan a maisardengd daytoy ket mabalin a saan laeng nga isuna ti pakapasamakan na daytoy no diket amangan no maulit manen kangrunaan na kadagiti awan ti laban na a tattao.
Adda pay ti inawagan ti bise mayor nga “squad” ken maipagarop a bukbulen daytoy dagiti sumagmamano a miembro ti juntra probinsyal.
Ummunan a kwinestyunaran ni Espiritu nga iti maikadwa a pannakaiyuswat ti hearing ket inrekomendaren ti Sang. Panlalawigan ti pannakasuspenso na.
Innayon na a saan man laeng nga inimbestigar a nalaing dagiti maseknan ti pudno a katatao ti nagreklamo.
