LAOAG CITY – Pimmusay ti driver ti motorsiklo ken nagtalinaed nga awan ti puot ti lubbon na kalpasan ti napasamak a desgrasya idiay Barangay 13, San Nicolas, Ilocos Norte.
Nabigbig ti natay a ni Glenn Xavier Tajorda y Peredo, 26, awanan ti asawa, call center agent ken residente iti Brgy 9, San Lucas iti nasao nga ili idinto a ti lubbon na ket ni Maribel Agustin Gaoiran, 20, awanan ti asawa ken residente iti Brgy 39, Pasiucan iti ili ti Bacarra.
Segun iti inisyal nga imbestigasyon, bayat nga agpalaud dagiti biktima iti Nalundacan St., bisinidad ti nasao a barangay ket naidungpar da iti maysa semento a flower pot.
Gapo iti daytoy, naidungpar da manen iti maysa nga poste a landok iti pagtaengan ti pamilya Tolentino a nangitunda manen ti pannakadungpar da iti manen iti concrete pavement ken naitupar ti ulo da ken nagsagaba ti sugat iti nagduduma a paset ti bagi da.
Dagus met a naitaray dagiti biktima iti Laoag City General Hospital (LCGH) ngem naideklara a dead on arrival ni Tajorda.
Innayon ti PNP-San Nicolas a dagiti biktima ket agnobyo ken ipakpakaamo da iti pamilya dagitoy a mapan da laeng iti nasao nga opsital.
