LAOAG CITY – Kinumpirmaran ni Police Senior Inspector Joseph Tayaban, ti chief of police idiay Badoc, Ilocos Norte ti panagpakamatay ti maysa a lalaki a taga Barangay Mabusag Sur ti nasao nga ili.
Nabigbig daytoy a ni Jerick Pagtulingan, agtawen iti 24, baro ken residente ti nasao a barangay.
Segun ken ni Tayaban, nakita lattan dagiti kakabsat ti biktima a nakabitin daytoy iti CR ti balay da babaen ti panagusar na ti tali.
Inbatad na nga intaray da ti biktima iti Rural Health Unit (RHU) iti nasao nga ili ngem saanen a nasalbar ti biagna.
Kuna ni Tayaban, basar iti imbestigasyon da, ti biktima ket maysa a “loner” wenno saan a makisarsarita ken kaykayat na ti agmaymaysa.
Innayon na nga awan ti ammo ti pamilya na a problema na malaksid laeng ti panangang-angal na ti panagsaksakit ti barukong na.
Nupay kasta, inbatad ni Tayaban nga agtultuloy ti imbestigasyon da tapno maamoan no ania ti pudno a rason a nagpakamatay ni Pagtulingan.
Innayon ti opisyal a mamati ti pamilya ni Pagtulingan nga awan ti foul play iti pannakatay ti biktima.
