LAOAG CITY – Manamnama a marugyan ti pannakaipatakder ti National Museum iti ili ti Paoay, partikular iti Arte Luna ita a tawen.
Daytoy ket kalpasan ti pormal a pannakapirma ti Certificate of Turnover iti nagbaetan ti gobierno probinsyal ken ti National Museum of the Philippines.
Ti nasao a proyekto ket nailatangan ti pondo nga umabot iti P60-milyon a pisos.
Apaman a malpas ti proyekto ket maibilang ti probinsya a maika-23 a pakaipasdekan ti National museum ditoy pagilian.
Mainaig iti daytoy, nagyaman da Governor Cecilia Araneta-Marcos ken ni Vice Governor Matthew Marcos-Manotoc iti National Museum of the Philippines iti panangidaulo ni Director General Jeremy Barns.
Kabayatanna, inrakurak met ni Mayor Shiela Galano iti ili ti Paoay a ti pannakaestablisar ti National Museum iti Ilocos Norte ket mangipasigurado iti agtultuloy a pannakapreserbar ti kultura ti probinsya, heritage ken pakasaritaan para kadagiti sumarsaruno nga henerasyon.
