LAOAG CITY – Inlawlawag ni Mr. Orlando Marquez Sr., National President ti Liga ng Transportasyon at Operators sa Pilipinas a nangisayangkatda ti unity walk tapno ipakita iti gobierno ti arungaingda nga arig mabaybay-andan maipanggep iti Public Utility Vehicle Modernization Program.
Segun kenkuana, mariknada a dakkelen ti nagastos ti gobierno para iti nasao a programa rason a masayanganda unay nangruna ket naruay met dagiti pasaheroda a mangayat iti ipaspasadada a jeepney.
Inbatadna a saanda a kumonkontra iti programa ti gobierno ngem kalikagumda laeng nga isingasing dagiti ammoda a makatulong kadakuada.
Kunana a naiget ti ipapaayda a suporta kadagiti amin a maipatpatungpal a programa iti babaen ti administrasion ni Pres. Ferdinand Marcos Jr.
Innayonna a mangnamnama isuna a mapagsasaritaan a naimbag ti nasao a programa tapno makatulong iti panagdur-as iti ekonomia ti pagilian.
