LAOAG CITY – Inbatad ni National Security Council (NSC) Assistant Director General Jonathan Malaya a manarimaan ti panagimbestigar da iti report a panagturong ti ado a Chinese students iti Tuguegarao city.
Daytoy ket kalpasan a kiniddaw ni Senator Majority Leader Joel Villanueva iti National Security Council nga imbestigaren da ti maipagarop a bigla a panagngato ti bilang dagiti Chinese students kadagiti pagadalan iti ciudad a nangitunda ti panagamak mainaig iti national security.
Segun ken ni Malaya, nangdutuk da ti intelligence units tapno agimbestigar iti sitwasyon iti lugar tapno madeterminar no pudno nga adda ti national security threat wenno kayat laeng dagiti maseknan ti umay ditoy ppagilyan tapno agadal.
Maipalagip nga immuna a nagpila ti nagsina a resolusyon da Cagayan 3rd district Rep. Joseph Lara ken Isabela 6th district Faustino “Inno” Dy nga agpanpanawagan para iti pannakaimbestigar ti nasao nga isyu.
Agamak dagiti agpanpanday linteg nga agbalin a pangta dagiti Chinese nationals iti national security ken ekonomiya ti pagilian.
Kabayatanna, inbatad ti Medical Colleges of the Northern Philippines, University of Cagayan Valley, University of Saint Louis Tuguegarao, ken Saint Paul University Philippines nga awan ti pagibasaran ket maibilang a deeply offensive ti alegasyon a pangta iti national security ti presensiya dagiti Chinese students kadagiti unibersidad iti ciudad.
