LAOAG CITY – Impakaamo ti Bise Mayor ditoy siudad ti Laoag a ni Vice Mayor Rey Carlos Fariñas nga adda ti naipadanon a report kenkuana a ti warehouse iti brgy 17 ditoy siudad a nauram idi laeng napalabas a tawen ket nagbalinen nga iligal a pagparparkingan dagiti motorista kasta met a pinagbalin a lokasion dagiti sumagmamano nga indibidual a pagpanganan.
Mainaig iti daytoy, kiniddaw ti Bise Mayor a no mabalbalin ket madalosan daytoyen a lugar tapno mapagbalin a temporario a pagparkingan dagiti motorista a kas inaramid ti City Government a dati a popular bazaar.
Patien ti Bise Mayor a dakkel a makatulong daytoy a plano aglalo ket kurang ti espasio ti pagparkingan iti merkado publiko ditoy siudad Laoag.
Kabayatanna inpettengna a no saanda nga umanamong kadaytoy nga suhestion ket naan-anayen a mapaseraan daytoy tapnon saan a makastrek dagiti indibidual aglalo ket risgo daytoy gapu ta adda pay laeng dagiti debris a nabatbati gapu iti napalabas nga uram a risgo kadagiti indibiwal nga agturturong kadaytoy a lugar.
