LAOAG CITY – Napateg latta ti Executive Order (EO) 116 wenno plano a panangipangato ti minimum access volume wenno MAV para iti panagangkat ti karne ti baboy tapno masigurado ti umdas a suplay iti pagilian.
Daytoy ti inbatad ni Agriculture Secretary Francisco Tiu Laurel Jr. kas sungbat iti inrakurak ni Agap Party-list Rep. Nicanor Briones a saanen a panawen ti nasao nga addang.
Inbatad ni Laurel a kiniddawna ti nasao a gakat iti napalabas a tawen kalpasan a ngimmato ti presio ti baboy gapu iti kinakurang ti suplay gubuay iti African Swine Fever (ASF).
Kunana a manaynayon pay ti epekto ti inflation gapu iti panagngato ti presio ti langis iti world market gapu iti krisis iti Middle East.
Kagiddan daytoy, posible a mangitunda ti baro a panagwaras ti African Swine Fever iti panagserrek ti panagtutudo a mabalin a makaapektar iti produksion ti baboy ken mangpaiget iti suplay daytoy.
