LAOAG CITY – Inlungalong ni Rep. Rodante Marcoleta ti House Bill 9400 a gagem a mangipaay ti direkta a suporta iti pinansial kadagiti barangay iti intero a lubong.
Kalikagum daytoy a matulungan dagiti komunidad nangruna kadagiti adda iti 4th ken 5th class a munisipalidad babaen iti panagusar dagiti saan a maus-usar a pundo ti gobierno tapno mapapigsa ti panangimaton ken kapabilidad dagiti barangay.
Basar iti panagsukisok, 12% laeng ti agarup 42 a ribu a barangay ti addaan ti umdas a pundo tapno agtultuloy ti operasion idinto a ti kaadduan ket marigrigatan iti kinakurang ti pundo.
Naammoan nga adu kadagiti Barangay Captain ket umaw-awat laeng ti ₱5,000 iti kada bulan a nababbaba pay ti sueldo dagiti tanod, health workers ken Lupon Tagapamayapa.
Gapu iti daytoy, naapektaran ti serbisio publiko kadagiti barangay.
Gagem ti gakat a mangbukel ti Barangay Affairs and Development Fund manipud iti 3-4% kadagiti saan a maus-usar a pundo kadagiti nagduduma nga ahensia ti gobierno.
Kagiddan daytoy, maaddaan pay ti Barangay Affairs and Development Commission a mangipaay ti umiso a pasueldo ken mangipasigurado a naurnos ti pannakausar ti pundo para iti pagsayaatan ti barangay.
Nagpanawagan ni Marcoleta iti Kongreso nga ipayalisto ti panangipasa daytoy tapno maikkan ti umdas a suporta kadagiti barangay.
