LAOAG CITY – Saan a makaumanay ti dua a pisos a nayun ti plete kadagiti pampubliko a jeep nga inaprubaran ti Land Transportation and Franchising Regulatory Board (LTFRB).
Daytoy ti inbatad ni Engr. Neil Jose iti Pugad-Lawin ditoy probinsya.
Inlawlawag ni Jose a gapu iti kinangina ti presyo dagiti produkto a petrolyo ket arigna awan ti papanan ti dua a pisos a nagngatoan ti plete iti jeep.
Gapu iti daytoy, kuna ni Jose a para kenkuana ket uray agingga iti 4 a pisos koma ti pakaingatoan ti plete.
Nupay kasta, inbatad ni Jose a masapol a saan laeng a ti nayun ti plete ti maadal no di ket rumbeng a makita metlaeng ti possible nga epekto na para kadagiti pasahero.
