LAOAG CITY – Inpakaammo ti Department of Social Welfare and Development (DSWD) a dagiti truck a naglaon iti 4,000 family food packs ket nakadanonen iti Tabogon, Cebu.
Segun kenni DSWD Secretary Rex Gatchalian, dagiti family food packs ket mibunong kadagiti residente nga apektado iti magnitude 6.9 earthquake a timmama iti Bogo City, Cebu ken narikna kadagiti kabangibang nga ili ken ciudad, ken dagiti probinsya.
Ado a residente ti saan pay a nakasubli iti pagtaengan da kalpasan ti panagbakwit dagitoy gapo iti panagamak da kadagiti aftershocks.
Inbatad ti DSWD a ti Tobogon ket maysa kadagiti apektado iti napigsa a gingined.
Kabayatanna, umabot met iti 1,900 a family food packs ti naipatulod iti Daanbantayan, Cebu ken nayun a 2,000 family food packs iti San Remigio.
Naipaay met dagiti ready-to-eat food boxes kadagiti residente iti Bogo City babaen kadagiti social workers and developmental workers iti DSWD Field Office 7 – Central Visayas.
