LAOAG CITY – Inrakurak ni National Bureau of Investigation (NBI) director Melvin Matibag nga addan ti sursurotenda a lead mainaig kadagiti pangta iti biag da Presidente Ferdinand Marcos Jr., First Lady Liza Araneta-Marcos ken dati nga House Speaker Ferdinand Martin Romualdez.
Nupay kasta, inbatad ni Matibag nga iti umno a panawen ti panangilawlawagda daytoy.
Inpasingkedna nga atendaran dagiti opisial ti National Bureau of Investigation ti sumaruno a panagdengngeg iti House Justice committee inton Abril 29.
Immunan a pinatulodan ti subpoena ti National Bureau of Investigation ti nasao a komite a mangipresentar ti resulta ti inwayat nga imbestigasion mainaig iti nasao nga isyu.
Ti isyu ket mainaig iti naisayangkat nga online briefing ni Vice President Sara Duterte idi Nobiembre 2024 nga ibatadna nga inbilinna ti panangpapatay kada Marcos, First Lady ken ni Romualdez no adda ti mapasamak kenkuana.
Kuna ni Matibag a ti testimonia ket nakasentro laeng iti nagbalin nga imbestigasion ti National Bureau of Investigation iti pangta ni Vice President Duterte pakairamanan dagiti digital pronouncement iti social media.
Maipalagip nga idi 2025, inrekomendar ti National Bureau of Investigation ti panangipila ti reklamo kontra ken ni Vice President Sara kalpasan ti inwayat nga imbestigasion.
