LAOAG CITY – Im-imbestigaranen ti National Bureau of Investigation (NBI) ti agwarwaras a peke a medical report ni Presidente Ferdinand “Bongbong” Marcos Jr.
Daytoy ket kalpasan a nagwaras iti social media ti nasao a dokumento nga insigida met a naglikudan ti Malacañang ken ti St. Luke’s Medical Center.
Inbatad ni National Bureau of Investigation Spokesperson Palmer Mallari a manarimaanen ti pannakikoordinar ti ahensia iti St. Luke’s Medical Center, ti ospital a nagturongan ti Presidente iti kallabes.
Iti baet nga awan pay ti pormal a kiddaw manipud iti Malacañang, inbilinen ni National Bureau of Investigation Acting Director Lito Patria Magno ti panangiwayat ti naun-uneg nga imbestigasion.
Karaman kadagiti kitkitaen ti National Bureau of Investigation ket no kasano a nagwaras iti online ti maipagarup a medical test results nga inawagan ti Palasyo a peke ken posible a paset ti maysa a destabilization effort.
Immunan a naglikudan ti St. Luke’s Medical Center ti nasao a dokumento ken inpettengda a sumursurotda iti patient confidentiality ken data privacy policies.
Kabayatanna, kinondenar met ti Presidential Communications Office ti panagwaras dagiti peke a dokumento kontra iti Presidente a saan a naggapu iti aniaman a lehitimo a panangtingiting.
Inballaag ti Malacañang nga ad-adalenen ti posible a legal nga addang kontra kadagiti adda iti likudan ti panagwaras ti saan nga husto nga impormasion.
