LAOAG CITY – Inlawlawag ni National Bureau of Investigation (NBI) Director Melvin Matibag a saan a mabalin nga iserbi ti arrest warrant kadagiti abogado ni Senador Ronald “Bato” dela Rosa.
Ni Senador Dela Rosa ket birbiruken dagiti otoridad tapno iserbi ti arrest warrant manipod ti International Criminal Court (ICC).
Inpetteng ti NBI Director a masapol nga iserbi a personal ti nasao a warrant iti indibidwal a rumbeng a maarestar kas nailanad iti Rules of Court.
Inpaganetget ni Matibag a saanna nga ammo no naggapwan ti ideya a naited ti nasao a warrant iti abogado na ken daytoy ti mangiserbi iti senador.
Innayon na a possible a naaddaan ti mix-up kadagiti immunan a naisyu a subpoena, summon ken ti warrant.
Palawag daytoy ti NBI Chief iti baet ti agwarwaras a video ti abogado ni dela Rosa a ni Atty. Jimmy Bondoc iti maysa nga interview kenkuana a mabalin nga iserbi ti arrest warrant manipod iti International Criminal Court dagiti abogado ti senador.
Linagip ti abogado ti gandat a panangiserbi idi Mayo 11 ti arrest warrant ken ni dati a Senador Antonio Trillanes IV.
Nagtalinaed met ti takder ni Atty. Bondoc a saan a mabalin nga ipatungpal ti arrest warrant manipod iti International Criminal Court malaksid laeng no daytoy ket inbilin ti Korte Suprema.
